Patrimonio e paisaxe en Santiago de Fontao

 O alumnado de 4º da ESO -Lucía, Olalla, Lucía, Xiana - participante no Proxecto Son das Cruces realizou  unha enriquecedora saída a Santiago de Fontao, culminando así o traballo desenvolvido ao longo de todo o curso.

Nesta ocasión, foron as propias alumnas e alumnos quen se converteron en guías, encargándose de dirixir a ruta dende o Cruceiro de Aguiar ata o antigo poboado mineiro. Ao longo do percorrido, compartiron cos seus compañeiros e profesorado todo o coñecemento adquirido, ofrecendo explicacións moi completas e interesantes.

Durante a visita, achegáronnos á toponimia da parroquia e á súa historia mineira, un dos elementos máis significativos da zona. Tamén falaron das distintas escolas que existiron, da desaparecida capela de San Antonio e da igrexa parroquial xacobea, así como da igrexa do poboado mineiro.

A ruta continuou por fermosas carballeiras que forman parte da paisaxe natural do lugar. Ademais, tiveron ocasión de coñecer espazos tan singulares como as antigas cárceres, o cuartel da Garda Civil, a casa dos enxeñeiros, antigo camiño romano, baños medicinais, pasando e a casa dos xefes da mina.

Un dos puntos máis curiosos foi a visita a un dos antigos cines da zona, hoxe reconvertido en auditorio, que serviu tamén para descubrir como era a vida social da época.

Foi unha mañá moi completa, chea de información, aprendizaxe e descubrimentos, na que tamén puideron ver fotografías antigas que lles permitiron comprender mellor a evolución do lugar ao longo do tempo.

Sen dúbida, unha experiencia moi valiosa que puxo en práctica todo o traballo realizado no proxecto e que contribuíu a reforzar o coñecemento e o orgullo polo patrimonio máis próximo.

Powered by Wikiloc

Descubrindo Santa María de Ollares co proxecto Son das Cruces

No marco do proxecto Son das Cruces, o alumnado de 4º da ESO realizou unha fermosa ruta pola parroquia de Santa María de Ollares, unha oportunidade única para coñecer de primeira man a riqueza natural, histórica e cultural da nosa contorna máis próxima.

A andaina comezou na Igrexa, situada na Cima da Vila, un lugar cargado de simbolismo dende o que se inicia o percorrido. Alí fixemos unha primeira parada para beber na fonte que leva o nome do lugar, recuperando así un pequeno xesto da tradición local. Dende este punto, puxemos rumbo cara á Costa, pasando pola fonte de Ollares, onde antigamente se situaba a escola da parroquia á que acudían nenos e nenas doutros tempos.

O camiño levounos a atravesar varias carballeiras, espazos de gran valor ambiental e paisaxístico, ata chegar a un fermoso merendeiro e á Aula da Natureza, situada á beira do encoro. Foi un momento ideal para descansar, compartir e gozar da contorna.

A continuación, emprendemos o regreso pola Chousa Vella, bordeando o encoro e pasando por novas carballeiras con árbores senlleiras que deixaron pegada no grupo pola súa beleza e singularidade. O percorrido levounos de volta á aldea, completando así unha ruta circular chea de descubrimentos.

A actividade rematou no lugar de Casas Novas, onde visitamos a capela de San Gregorio, pechando a xornada cun último achegamento ao patrimonio da parroquia.

Esta ruta pode consultarse en Wikiloc grazas ao traballo de Xiana, David, Almudena e Lucía, a quen queremos agradecer a súa colaboración.

Unha experiencia enriquecedora que nos permitiu coñecer mellor o noso territorio, valoralo e sentirnos parte del.

Powered by Wikiloc

Descubrindo San Xoán de Toiriz: unha ruta con historia

O alumnado de 4º da ESO Fabián, Elena e Xoel participou recentemente nunha saída didáctica dentro do proxecto Son das Cruces, unha experiencia que nos permitiu coñecer de primeira man o patrimonio histórico e cultural da nosa contorna.

A ruta comezou no lugar da Cima da Aldea, dende onde iniciamos o percorrido por unha fermosa corredoira que nos levou ata Foxacos. Durante o traxecto, o alumnado puido observar elementos propios da paisaxe tradicional galega, así como reflexionar sobre a importancia de conservar estes espazos.

A continuación, desprazámonos ata Madrosende, onde visitamos a antiga escola de nenas. Neste mesmo lugar achegámonos á Igrexa de San Xoán, un templo de grande interese histórico, construído no século XII e que sufriu diversas reformas no século XVIII. Trátase dunha igrexa de unha soa nave cun ábside, na que destaca o altar, presidido por unha cruz datada no ano 1932. Tamén chamaron a atención as súas campás: a máis grande, de 1881, e a pequena, de 1880. Aqui atopamos un castiñeiro senlleiro.

O percorrido continuou pasando polo cruceiro da Senra en dirección a Fafias. Neste lugar atopamos un interesante elemento arquitectónico: a parte superior do portal dunha casa de pedra, coñecida como dintel ou cargadoiro, datada en 1771. Fafias foi tamén un punto importante na vida social da zona, xa que alí

se celebraba a feira das mazarocas. Ademais, antigamente acollía a escola dos nenos e conserva outro cruceiro que forma parte do patrimonio local.

Seguimos a ruta pasando pola fonte do lugar ata chegar á área recreativa, onde puidemos observar unha antiga inscrición, hoxe xa ilexible, que esperta a curiosidade sobre o pasado deste espazo.

Na aldea inda quedan moitos hórreos, construccións onde se gardaba o millo.

Finalmente, regresamos ao punto de partida, pechando así unha xornada enriquecedora na que o alumnado non só coñeceu mellor a súa contorna, senón que tamén valorou a importancia de preservar o noso patrimonio cultural e histórico.

Powered by Wikiloc

Apadriñamento lector

O alumnado de Relixión de 1º de ESO acudiu onte ao CEIP Plurilingüe Cerdeiriñas de Piloño a realizar un apadriñamento lector. No patio do centro leron contos ao
alumnado de infantil que estivo moi atento e interesado nas historias que os seus padriños e madriñas maiores contaban.
A continuación, na biblioteca do centro, realizaron unha actividade en torno á

lectura. Fixeron unhas árbores moi fermosas. Nos troncos escribiron os seus nomes e pintaron debuxos alusivos aos contos, creando así o bosque dos libros!
Foi unha xornada moi especial na que compartimos historias e experiencias! Moitas grazas ás profes de infantil polo seu traballo e implicación!

Nas alturas dos Picos: unha viaxe para lembrar

 A nosa saída a Asturias e Cantabria chega ao seu fin deixando unha chea de experiencias inesquecibles. Un dos momentos máis impactantes foi, sen dúbida, a subida no único telesférico dos Picos, que nos elevou máis de 200 metros ata situarnos preto dos 2.000 metros de altitude. A medida que ascendían, o silencio e a inmensidade da paisaxe ían conquistando a todos e todas.

Xa no alto, dende o Miradoiro do Balcón, tiveron a oportunidade de comprender mellor este impresionante entorno natural. Alí, o alumnado participou nunha explicación completa na que se abordaron aspectos clave como a formación xeolóxica dos Picos, as características do seu clima, a súa rica historia, a diversidade biolóxica e mesmo trazos da etnografía da zona.

Ademais, realizaron un paseo polas altas cimas de Cantabria, onde puideron observar a pegada dos antigos glaciares, minas abandonadas e un espectacular ambiente de alta montaña. A experiencia fíxose aínda máis especial ao ter a sorte de ver voar sobre as súas cabezas aves como os voitres e os alimouches, completando así unha xornada única en contacto directo coa natureza.

Foi unha experiencia que combinou aprendizaxe e emoción, natureza e convivencia, e que, sen dúbida, permanecerá na memoria de todos e todas como unha das vivencias máis enriquecedoras do curso.

Un día inesquecible en Cabárceno

 

Hoxe o alumnado viviu unha xornada moi especial visitando o Parque da Natureza de Cabárceno, un espazo único situado nun antigo enclave mineiro que sorprende pola súa beleza e dimensión.

Ao longo do día, puideron observar de preto unha gran variedade de animais salvaxes que viven en réxime de semiliberdade, aprendendo sobre os seus hábitats, costumes e a importancia da súa conservación. Leóns, elefantes, xirafas ou osos foron algúns dos protagonistas desta experiencia tan enriquecedora.

Un dos momentos máis emocionantes da visita foi, sen dúbida, a demostración de voo de aves rapaces, onde o alumnado quedou abraiado coa destreza e elegancia destas aves en pleno voo.

Sen dúbida, foi unha saída didáctica chea de aprendizaxes, emocións e convivencia que quedará na memoria de todos e todas.

Un día de aventura, encontro e emocións entre o Sella e Covadonga

No segundo día da  excursión, o entusiasmo xa se notaba dende primeira hora da mañá. Coa brétema
levantándose pouco a pouco e o son da auga acompañándonos, o alumnado preparouse para unha das experiencias máis esperadas: o descenso en canoa polo río Sella. 

Entre risas, algún que outro salpico inesperado e moito compañeirismo, foron
avanzando ao ritmo da corrente, descubrindo a beleza da natureza e aprendendo tamén a coordinarse e axudarse uns aos outros.

A aventura da mañá deixou paso a unha tarde máis tranquila, pero non menos especial. Visitamos Covadonga, un lugar cheo de historia, espiritualidade e significado. A impoñente basílica acolleunos co seu silencio solemne. Despois, achegámonos á coñecida Cova da Santina, onde moitos aproveitaron para facer unha pequena parada persoal, un intre de calma no medio da viaxe.

Para rematar o día, paseamos por Cangas de Onís, gozando do ambiente das súas rúas e da beleza da súa ponte romana, símbolo dunha terra rica en tradición e cultura. Foi o peche perfecto para unha xornada intensa, chea de emocións, aprendizaxes e momentos compartidos que, sen dúbida, quedarán na memoria de todos e todas.

Un día de aventura, encontro e emocións entre o Sella e Covadonga

No segundo día da  excursión, o entusiasmo xa se notaba dende primeira hora da mañá. Coa brétema
levantándose pouco a pouco e o son da auga acompañándonos, o alumnado preparouse para unha das experiencias máis esperadas: o descenso en canoa polo río Sella. 

Entre risas, algún que outro salpico inesperado e moito compañeirismo, foron
avanzando ao ritmo da corrente, descubrindo a beleza da natureza e aprendendo tamén a coordinarse e axudarse uns aos outros.

A aventura da mañá deixou paso a unha tarde máis tranquila, pero non menos especial. Visitamos Covadonga, un lugar cheo de historia, espiritualidade e significado. A impoñente basílica acolleunos co seu silencio solemne. Despois, achegámonos á coñecida Cova da Santina, onde moitos aproveitaron para facer unha pequena parada persoal, un intre de calma no medio da viaxe.

Para rematar o día, paseamos por Cangas de Onís, gozando do ambiente das súas rúas e da beleza da súa ponte romana, símbolo dunha terra rica en tradición e cultura. Foi o peche perfecto para unha xornada intensa, chea de emocións, aprendizaxes e momentos compartidos que, sen dúbida, quedarán na memoria de todos e todas.

Aventura, convivencia e natureza en Asturias e Cantabria

O alumnado de Relixión de 3º e 4º da ESO e 1º de Bacharelato comezou a súa excursión a Asturias e Cantabria, acompañado polos profesores Araceli e Samuel. 

Durante catro días, vivirán unha experiencia de convivencia única, na que compartirán tempo, fortalecerán vínculos e estarán en contacto directo coa natureza, traballando o respecto, a solidariedade e a cooperación.

Neste primeiro día, a aventura xa comezou con forza nun parque de
actividades, onde o alumnado puido poñer a proba a súa destreza, superar retos e, sobre todo, aprender a confiar nos demais e en si mesmos. Foi unha xornada chea de emocións, risas e compañeirismo.

E mañá… que novas experiencias lles agardarán? Seguro que será outro día cheo de descubrimentos, aprendizaxes e momentos inesquecibles que seguirán facendo desta viaxe unha vivencia moi especial.

Compartindo contos, creando ilusións. Apadriñamento lector

 

O alumnado de 1º de ESO da materia de Relixión visitou hoxe ao alumnado de infantil do colexio A Nosa Señora da Piedade para compartir unha fermosa xornada de lectura.

Durante a mañá, pequenos e maiores gozaron de contos, xogos e momentos de convivencia que encheron o parque de ilusión e sorrisos. Esta actividade permitiu non só fomentar o gusto pola lectura, senón tamén fortalecer valores como a empatía, o coidado dos demais e a colaboración.

Queremos agradecer ás profes de infantil a súa acollida e o seu excelente traballo, que fixeron desta experiencia un recordo moi especial para todo o alumnado

Santiago de Fontao: lugar de baños e volframio

 O alumnado de 4º da ESO da materia de Relixión levou a cabo unha enriquecedora ruta dentro do proxecto Son das Cruces pola parroquia de Santiago de Fontao, unha experiencia que nos permitiu descubrir o patrimonio, a historia e a paisaxe deste lugar tan singular.

A nosa andaina comezou no cruceiro de Aguiar, punto de partida desde o que Olalla, Lucía C., Lucía S. e Manuela nos ofreceron unha explicación sobre as fermosas vistas do río, onde se conservan algúns dos muíños da parroquia e desde onde tamén se pode contemplar o mosteiro de Carboeiro. Situám



onos ademais no antigo Camiño Real que conducía a Compostela, cargado de historia e simbolismo.

Comezamos o ascenso e axiña nos atopamos coa carballeira de San Antonio, espazo que lembra a existencia dunha antiga ermida. Continuamos o percorrido polo lugar da Brea, desde onde puidemos observar parte das antigas explotacións mineiras e o lugar dos Baños, onde hoxe se sitúa o Balneario Baños da Brea.

Xa no Quinteiro de Abaixo, chamaron a nosa atención os interesantes dinteles ou cargadoiros das vivendas, así como unha casa grande con capela. No Quinteiro de Arriba localizamos unha das escolas da parroquia, que non era a única, xa que tamén existían as do poboado e outra máis situada nun punto máis elevado.

Dirixímonos logo ao lugar de Fontao, onde se atopa a igrexa xacobea de estilo románico. A pesar das reformas, conserva elementos de gran valor, como nove canecillos con figuras animais e vexetais na cornixa do ábside. Tamén destaca un tímpano románico reutilizado na porta norte, unha peza granítica semicircular ricamente decorada. Neste lugar tamén coñecemos a casa de Belisario, pertencente a unha das familias máis destacadas da época.

Comezamos o descenso atravesando parte da antiga explotación mineira, observando as edificacións abandonadas que antigamente acollían panaderías, tabernas e carnicerías, situadas xunto ás casas dos enxeñeiros e dos xefes da mina. No percorrido pasamos tamén polo cárcere, o botiquín, o cuartel da Garda Civil e a que foi a última taberna en funcionamento ata hai apenas unha década.

Xa de camiño ao poboado, puidemos ver o edificio do Guguru, que ao longo do tempo desempeñou funcións de prisión, vivenda dos responsables da mina e oficina. No poboado, hoxe remodelado, atopamos algúns carballos senlleiros e lembramos espazos como a antiga tenda de bicicletas, a fábrica de gaseosas e o actual campo da festa, visible ao lonxe.

A visita continuou polo cine, hoxe convertido nun auditorio con capacidade para 300 persoas, polo Museo do Volframio —antiga igrexa do poboado— e polas escolas e a casa do mestre. Este poboado, que na época do volframio chegou a ser unha auténtica vila, acollía unha intensa actividade económica e social, con numerosos oficios e profesionais: parteiras, pescadeiros, carniceiros, tecedeiras, xastres, taberneiros, muiñeiros…

Sen dúbida, esta ruta foi unha oportunidade única para coñecer de preto a historia, o patrimonio e a memoria colectiva da parroquia de Fontao, ao tempo que o alumnado se converteu en protagonista activo da aprendizaxe.

Powered by Wikiloc

Un Vía Crucis na radio

Coa chegada da Semana Santa, o alumnado de 1º e 2º da ESO de Relixión participou nunha actividade moi especial: unha representación radiofónica das estacións do Vía Crucis.

A través da radio escolar, as voces convertéronse en protagonistas para dar vida a cada unha das estacións, recreando con sensibilidade e respecto os momentos máis significativos deste camiño. Foi unha experiencia diferente, na que o alumnado non só traballou a expresión oral, a entoación e a creatividade, senón tamén a capacidade de transmitir emocións e mensaxes profundas a través da palabra.

Cada intervención estivo chea de implicación, logrando crear unha atmosfera de reflexión e recollimento que chegou a toda a comunidade educativa. A radio converteuse así nun espazo de encontro, onde tradición e innovación se deron a man para achegar o significado da Semana Santa dun xeito próximo e participativo.

Sen dúbida, unha actividade enriquecedora que permitiu vivir e compartir o sentido do Vía Crucis dunha forma diferente, facendo da aprendizaxe unha experiencia viva e significativa.

O alumnado leva a aula á radio

No noso centro o alumnado continúa demostrando que aprender pode ser tamén creativo, dinámico e moi motivador. Nas últimas semanas, os rapaces e rapazas están a traballar contidos de diversas materias a través da radio escolar, elaborando programas e podcast sobre temas moi variados relacionados co que estudan na aula.

Esta experiencia permítelles investigar, seleccionar información relevante e transformala nun formato atractivo para quen escoita. Deste xeito, os contidos de diferentes áreas convértense en programas interesantes nos que o alumnado explica, debate e comparte o aprendido.

Ademais, a radio convértese nun espazo perfecto para desenvolver habilidades moi importantes: a capacidade de traballar en equipo, organizar tarefas, respectar as opinións dos compañeiros e expresarse con claridade diante dun micrófono. Cada programa é o resultado dun proceso colaborativo no que todos e todas achegan algo: desde a preparación do guión ata a gravación final.

Os podcast que están a crear demostran non só o que saben, senón tamén a súa creatividade, responsabilidade e entusiasmo por comunicar. Sen dúbida, a radio escolar está a converterse nunha ferramenta educativa moi valiosa, na que aprender e comunicar van da man.

Proxecto Ríos: O Abeseiro

Tres profesoras dos departamentos de Bioloxía e Física e Química visitaron a área recreativa de Toiriz co fin de sentar as bases do Proxecto Ríos. Elexiron un treito de 100 m de río para inspeccionar co alumnado no mes de maio, e levar a cabo estudos sobre a calidade hidromorfolóxica, fisicoquímica e biolóxica das nosas augas. Ademais, tomaron mostras de auga en diferentes zonas para o seu posteior análise no laboratorio escolar. Deste xeito, relacionamos as materias de índole científica coa súa realidade máis próxima, a vez que se espertan capacidades como a observación, a experimentación, o tratamento de datos e a extraccións de conclusións.